ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის მხარდაჭერით და საქართველოს გიდების ასოციაციის ორგანიზებით თბილისში გიდების ასოციაციების მსოფლიო ფედერაციის მე-18 საერთაშორისო კონგრესი WFTGA Convention 2019 გაიმართა.

5 დღიანი ღონისძიების ფარგლებში საქართველოს მსოფლიოს 70-მდე ქვეყნიდან 300 ტურისტული გიდი და ტურიზმის ბიზნესის წარმომადგენელი ეწვია.

აღნიშნული კონგრესის საქართველოში ჩატარება ტურიზმის სექტორის ხელშეწყობისათვის მეტად მნიშნვნელოვანი ღონისძიებაა, ის მიზნად ისახავს საქართველოში ტურიზმის დონის ამაღლებასა და ქვეყანაში ტურისტული გიდების პროფესიის განვითარებას.

კონგრესის მონაწილეები ორი კვირის განმავლობაში საქართველოს რეგიონებს ეწვევიან და ქართულ კულტურასა თუ ტრადიციებს გაეცნობიან.

საქართველოს გიდების ასოციაციის პრეზიდენტის ქეთი მელაძის განცხადებით, მიმდინარე კონგრესი ქვეყნისთვის უმნიშვნელოვანესი მოვლენაა, რადგან მოწვეული 300 დელეგატი მომავალში ჩვენს ქვეყანასა და კულტურას დიდ რეკლამას გაუწევს.

აღსანიშნავია, რომ გიდების ასოციაციების მსოფლიო ფედერაცია საერთაშორისო კონგრესს ორ წელიწადში ერთხელ მართავს.